1. Fil-bidu tal-lezzjoni, bl-għajnuna tal-preżentazzjoni provduta, oħloq diskussjoni fuq id-differenzi u s-similitudnijiet bejn il-GPS u l-mappa u kif u meta l-istudenti ġieli użawhom.
2. Agħti ftit informazzjoni fuq kif jaħdem il-GPS, prinċipalment l-importanza tat-teknoloġiji relatati mal-ispazju biex jagħtuna data korretta.
3. Bħala parti minn din il-lezzjoni, jew f’lezzjoni preċedenti, tajjeb li ssir introduzzjoni jew konsolidazzjoni ta’ frażijiet ewlenin biex jingħataw direzzjonijiet bil-Malti, inkluż il-boxxla u l-irjieħ. Ċerti frażijiet huma pprovduti fil-preżentazzjoni għall-użu fil-klassi.
4. Attività fil-klassi (Nimxu mad-direzzjonijiet): L-għan ta’ din l-attività huwa li l-istudenti jaraw eżempji ta’ kif wieħed jista’ jagħti direzzjonijiet u jkunu kapaċi jimxu magħhom biex jaslu għal destinazzjonijiet partikolari. Hemm diversi modi kif tista’ ssir l-attività, u l-għalliema jistgħu jagħżlu wkoll issirx individwalment, f’pari, fi gruppi, jew bħala klassi sħiħa.
   1. L-istudenti jaqraw test qasir b’direzzjonijiet, u xogħolhom ikun li jsibu d-destinazzjoni fuq il-mappa provduta, b’għażla ta’ żewġ destinazzjonijiet possibbli. 
   2. L-istudenti jistgħu jużaw Google Maps fuq il-laptop/tablet tagħhom, bi street view, biex ikunu jistgħu jivviżwalizzaw aħjar fejn sejrin. Madankollu, dan il-mod ma jistax jintuża għad-destinazzjonijiet kollha minħabba l-limiti ta’ Google Maps. 
   3. L-istudenti jistgħu jimxu mad-direzzjonijiet mogħtija bħala parti minn ħarġa l-Imdina, il-Belt jew Għawdex, biex ikollhom esperjenza f’kuntest reali flok fil-klassi.
5. Attività f’pari (Nimxu mad-direzzjonijiet): L-għan ta’ din l-attività huwa li l-istudenti jitgħallmu jagħtu direzzjonijiet u jimxu magħhom ukoll. Għal din l-attività jistgħu jintużaw l-istess mapep provduti fl-attività Nimxu mad-direzzjonijiet. Student wieħed jagħżel il-punt tat-tluq u d-destinazzjoni, u xogħlu huwa li jwassal lill-istudent l-ieħor għad-destinazzjoni t-tajba billi jagħti d-direzzjonijiet. Imbagħad ipartu l-irwoli. 
6. Attività tal-kitba (Fejn sejrin?): Din tista’ ssir kemm id-dar u kemm fil-klassi. L-għan huwa li l-istudenti jiddeskrivu kif se jaslu f’post partikolari fil-belt jew raħal li jgħixu fih, bl-għajnuna ta’ numru ta’ mistoqsijiet. Din l-attività tista’ tiġi abbinata wkoll mal-Istudji Soċjali – Taħriġ Prattiku A għaliex f’dan it-taħriġ l-istudenti jridu jagħmlu fieldwork madwar il-belt jew raħal fejn joqogħdu u jirrekordjaw l-osservazzjonijiet tagħhom. 
7. Attività addizzjonali: Il-logħba provduta minn Spazju.eu. L-għan tal-logħba huwa li wieħed iqassam l-ikel (speċifikament pastizzi) fuq mutur, f’postijiet differenti bl-għajnuna ta’ GPS skont l-ordnijiet li jirċievi, iżda minħabba solar storm attiv, il-GPS joqgħod jintefa’ u jerġa’ jinxtegħel. Waqt li l-GPS ikun mixgħul, il-player jiġi pprovdut b’mod dirett il-pożizzjoni ġeografika tiegħu iżda meta jkun mitfi, ma jkollux din l-informazzjoni. Għalhekk ikollu juża l-mappa b’mod aktar tradizzjonali sabiex jasal għad-destinazzjoni.

N.B. L-attivitajiet imsemmija hawn fuq jistgħu jsiru kemm f’lezzjoni waħda jew mifruxa fuq bosta lezzjonijiet, sabiex jittieħdu in kunsiderazzjoni restrizzjonijiet ta’ ħin u l-progress naturali minn ħiliet riċettivi għal dawk produttivi.